نقطة نظام ثورة مصر
تعالوا ندوَّر عـ الناس
تعالوا ندوَّر عـ الماس
فيه ناس غير الناس
مش حنساوى مابين الطاهرين والأنجاس
اللى سرق ونهب ...
غير اللى فى عز الثوره
كانوا دعم وكانوا حماس
اللى فى عز الضلمه
كانوا النور
واللى فى عز النكسه
كانوا عبور
اللى ضرب عـ الخلق رصاص
غير الحراس
اللى فى عز الظلم
كانوا الحق
واللى ابتدوا ثورتهم قبل الثوره
وقالوا لأ
اللى فـ عز السرقه وعز الهدم
كانوا بيرموا أساس
اللى قتل وهرب ... غير الثوار
غير الأشراف
من قبل عبور الثوره
كانوا حرب استنزاف
فيه اللى حِلم بالثروه
وفيه اللى حمى الثوره
عُمر ما كان الحق فى وسط جموع التحرير ينداس
الناس زى صوابع الإيد
فيه جبله ... عنيد ...
وفيه الإنسان
فيه ناس غير الناس
فيه ناس أغلى من الماس
تعالوا ندوّر عـ الناس
ــــــــــــــــــــــــــــ
شعر : حسام العقدة
