عرقك : شعر حسام العقدة


عرقك : شعر حسام العقدة
....................................
مش من حقك .. ترفع حسك..
حسك عينك
مش من حقك .. تفتح بقك
أو تفتح عينك
مش من حقك .. حتى تعبر
اصبر لازم تصبر
٠٠٠
ازرع .. اقلع .. اغزل .. صنّع
صلّح .. وصل .. ألّف .. ابدع
واذا فكرت فى مره تفكر!!
يبقى حتخسر ٠٠ مش من حقك
٠٠٠
عادى٠٠ حتى من الاحلام حتخاف
عادى ٠٠ مش حتلاقى العيش الحاف
تبقى فى وادى ..
وتلقى الناس التانيه فى وادى
وبتاكل عرقك
٠٠٠
عايز تغلط وتقول رايك
عايز يبقى الفرق بسيط بينه وبينك
اللى بياكل حقى وحقك٠٠ مش من حقك
٠٠٠
اياك صُبح القهر يفوتك٠٠ والعبوديه
أجِّل كل الوقفات الاحتجاجيه
وابقى اعتصم المره الجايه٠٠
بس بموتك
واذا فكرت تمارس حقك ٠٠ مش من حقك
واياك تنكر ٠٠
عمرك ماعانيت م الاهمال
صحه .. واكل.. وشرب .. وعال العال
وبتاخد راحه فى عيد العمال٠٠
إيه٠٠حتبرطم؟!
أو حبة مندسين حتزقك٠٠
مش من حقك
لو عايز مره تكون٠٠
تبقى اكيد مجنون!!
لو عايز مره تحس انك عايش ..
زى العايشين
عايز ترجع تانى تثور٠٠
تور٠٠ وحتفضل تور
بس عشان الساقيه تدور 
لازم تفضل انت تدور
وتغمى عينيك٠٠
وتقفل بقك٠٠
هوه ده فعلا فعلا٠٠ حقك