الشعب المصرى اتكلم : بقلم الشاعر حسام العقدة

الشعب المصرى اتكلم : بقلم الشاعر حسام العقدة
......................................................................
الشعب المصرى اتكلم
خللى العالم يتعلم
ورؤوس الظلم تسلم
كان حلم حقيقى بعيد
حنقول ايه ولا نعيد 
احساس احلى من العيد
بيعيشه الشعب المصرى
٠٠٠
الشعب طلع مش همه
جاب الحريه بدمه
وشهيد شايله ابوه وامه
راجل سبعه وستين
وبطل تلاته وسبعين
فى الواحد والعشرين
راجع م الشعب المصرى
٠٠٠
الشعب المصرى ده احنا
محمود مع مرسى وحنا
عدينا مع بعض المحنه
مش احزاب ولا تيار
مش حركات لأ٠٠ افكار
محتاجه لإ ستقرار
فى حياة الشعب المصرى
٠٠٠
الشعب المصرى يثور
ويعدل فى الدستور
ويبدل ضلمه بنور
الفاسد هربان خاف
لكن حق وانصاف
عارفين مين م الاشراف
لسه مع الشعب المصرى
٠٠٠
الشعب المصرى اختار
وأخد مع بعضه قرار
ثوار٠٠ ثوار٠٠ ثوار
هتافات بحروف عربيه
عايزين عدل وحريه
وحكومه صريحه قويه
توقيع ٠٠ الشعب المصرى
٠٠٠
الشعب شبابه بهرهم
كانت السلطات فاكرينهم
فاضيين ومافيش خوف منهم
كام واد ومعاه كام بت
قاعدين يلعبوا ع النت
كان هوه ده اول خط
بيخطه الشعب المصرى
٠٠٠
الشعب المصرى اتجمع
وحلف ما لبيته حيرجع
غير لما العالم يسمع
خطوات مع بعض تسير
تعمل اضخم تغيير
ومافيش ابدا تفسير
غير انه الشعب المصرى
٠٠٠
الشعب المصرى اصر
وما تسألنيش ع السر
الحر حيفضل حر
شعارات بدأت تتطبق
وحاجات لسه ها تتحقق
دلوقتى الناس بتصدق 
قيادات الشعب المصرى
٠٠٠
الشعب المصرى اتحدى
فوق احتمالاتهم عدى
ثورات سلميه وجاده
مش وقت كلام سيبنى
وانده ابنك وابنى
عايزين نرجع نبنى
بإيدين الشعب المصرى
....................
حسام العقدة